Gihingusgan sa Department of Energy (DOE) ang ilang assessment sa sitwasyon sa suplay sa kuryente sa mga isla ug off-grid nga mga lugar sa nasod isip tubag sa mando ni Presidente Ferdinand Marcos Jr., aron maseguro ang patas ug barato nga access sa kuryente sa matag Pilipino. Karong bag-o, ang DOE nihimo og assessment sa Isla sa Camotes, Cebu human makadawat og report sa kanunay nga brownout.
Matod ni DOE Assistant Secretary Mario Marasigan, susama kini sa mga problema nga nasinati sa Siquijor nga kulang sa power generation ug distribution capacity. Sa pagkakaron, ang Isla sa Camotes gisuplay sa Camotes Island Power Generation Corporation (CAMPCOR) gamit ang mga diesel generator. Apan dili paigo ang single-phase distribution system sa Camotes Electric Cooperative, Inc. (CELCO) nga makahatud og elektrisidad nga maoy hinungdan sa kanunay nga pagkapalong sa kuryente sa maong dapit.
Dugang pa, nahimong problema usab ang paghatod sa diesel ilabi na panahon sa bagyo, nga nalangay ang paghatod sa gasolina gikan sa Sugbo. Tungod niini, nakita sa DOE ang panginahanglan sa mas lig-on ug malungtarong mga solusyon sama sa hybrid renewable energy systems, solar panels nga dunay battery storage, ug energy efficiency measures.
Gidugang sa ahensya nga kini nga inisyatiba nagtumong dili lamang sa pagsulbad sa mga problema karon sa nasud kondili paghatag usab ug mga long-term nga solusyon sa sektor sa enerhiya sa mga hilit nga komunidad dinhi sa Pilipinas.
