Nakadawat og ₱5 milyon nga pondo ang lokal nga panggamhanan sa New Bataan ug Montevista ubos sa Medical Assistance to Financially Incapacitated Patients o MAIFIP Program pinaagi sa pakigtambayayong sa Department of Health (DOH) Region XI.
Pormal nga gipirmahan ang Memorandum of Agreement (MOA) tali sa mga lokal nga panggamhanan ug DOH Region XI, nga gipangulohan ni Regional Director Dr. Ellenietta Herundina Maria Victoria N. Gamolo.
Ang maong pondo gamiton alang sa Rural Health Unit (RHU) o Primary Care Facility (PCF) aron mapalapdan ang mga serbisyong panglawas nga mahatag sa mga residente, ilabina sa mga nanginahanglan og tabang medikal.
Gipasalamatan sa LGU New Bataan ang suporta ni 1st District Congresswoman Maricar Zamora-Mabanglo sa pagpalusot sa maong pondo alang sa duha ka lungsod.
Kahibaloan nga usa kini ka konkretong lakang sa pagtuman sa pangandoy ni Gov. Raul Mabanglo nga walay katawhan nga mabiyaan ug adunay kasaligan nga duolan sa panahon sa panginahanglan alang sa mas malamboong mga lungsod sa Davao de Oro.
Samtang, kabahin kini sa paningkamot sa administrasyon ni New Bataan Mayor Atty. Bianca Cualling Brua nga mapalambo ang serbisyo panglawas ug masiguro nga adunay maduolan ang mga katawhan nga nanginahanglan og tabang medikal.
Photo courtesy: Municipality of New Bataan










