Giplanohan sa Lokal nga Panggamhanan sa Kapalong ang posibleng pagtukod og PhilHealth YAKAP Accredited Primary Care Clinic sa lungsod aron mas mapalapdan ang access sa mga residente sa nag-unang serbisyo panglawas.
May kalabotan niini, mibisita sa opisina ni Kapalong Mayor Edgardo L. Timbol niadtong Lunes, Nobyembre 16, 2026, ang representante sa Dulalia Family Medical Services Inc. aron hisgotan ang posibleng pakigtambayayong sa lokal nga panggamhanan.
Gipresentar ni Kenneth Andrew Sabroso, Area Manager sa maong kompanya, ang proposal nga nagtumong sa paghatag og libre nga konsultasyon, preventive health screenings, ug access sa mga tambal nga sakop sa programa.
Lakip usab sa gisugyot nga serbisyo ang community outreach ug on-site registration alang sa PhilHealth YAKAP aron mas mapaduol ang mga serbisyong medikal ngadto sa nagkalain-laing komunidad.
Kabahin kini sa padayong paningkamot sa LGU Kapalong nga makig-alayon sa nagkalain-laing sektor aron mapalambo ang mga programa sa panglawas ug masiguro ang mas lapad nga pag-abot sa serbisyong medikal ngadto sa matag residente.
Photo Courtesy: Kapalong InfoCenter










