Gibanabanang mikabat sa ₱534,300 ang inisyal nga danyos sa sunog nga miigo sa mga establisemento ug puy-anan sa Purok 10A, Guinoyoran Road, Barangay Poblacion, Valencia City, alas-12:50 sa kadlawon kaniadtong milabayng adlaw.
Matod sa Fire Arson Investigator sa Bureau of Fire Protection (BFP) Valencia sa pakighinabi sa Juander Radyo Malaybalay, mixed occupancy ang mga naapektuhang istruktura nga naglakip sa usa ka sari-sari store, barbershop, tindahan sa frozen foods, usa ka duha-ka-andanang building, ug duha ka gagmay nga balay.
Padayon pang giimbestigahan sa BFP ang hinungdan sa sunog human giklaro sa imbestigador nga wala pa makumpirma kon faulty wiring ba ang nakaingon o nalambigit sa insidente, samtang gitataw usab nga inisyal pa lamang ang maong banabana sa danyos ug mahimo pa kining mausab depende sa resulta sa dugang pagtimbang-timbang ug sa kahimtang sa insurance sa mga apektadong establishamento.
Alayon niini, kusganong nagpahimangno ang buhatan sa publiko nga magbinantayon kanunay ug seguruhon ang hustong koneksyon sa mga linya sa kuryente sa panimalay aron malikayan ang susamang insidente.
Photo courtesy: BFP / Valencia City










