Nadakpan sa mga sakop sa Station Drug Enforcement Unit (SDEU) sa Carmen Municipal Police Station ang usa ka 29-anyos nga lalaki atol sa buy-bust operation alas 12:05 sa kadlawon niadtong Nobyembre 15, 2026, sa lungsod sa Carmen, Davao del Norte.
Giila ang suspetsado sa alyas Charlie ug residente sa maong lungsod. Gipahigayon ang operasyon ubos sa pagdumala ni PMAJ Lope I. Cebreros III, Chief of Police, nga miresulta sa pagkasakmit sa duha ka heat-sealed transparent plastic sachet nga adunay gituohang shabu, lakip na ang buy-bust item nga napalit sa kantidad nga 1,500 pesos, ug marked money.
Gibanabana nga usa ka gramo ang kinatibuk-ang gibug-aton sa nakumpiskang gidudahang droga nga adunay standard drug price nga mokabat sa 6,800 pesos. Gihimo usab ang hustong pagmarka ug imbentaryo sa mga ebidensya diha mismo sa lugar, atubangan sa suspetsado ug sa mga gikinahanglang saksi, subay sa balaod.
Sa pagkakaron, anaa na sa kustodiya sa Carmen Municipal Police Station ang suspetsado ug ang mga nakumpiskang ebidensya alang sa dokumentasyon, dugang nga imbestigasyon ug hustong disposisyon. Padayon usab ang kampanya sa kapulisan batok sa ilegal nga droga aron mapalambo ang kaluwasan sa komunidad.
Photo Courtesy: Adobe Stock










