Giduso ang dugang nga pagpalambo sa industriya sa cacao sa Zamboanga Sibugay pinaagi sa panag-uban sa Department of Trade and Industry o DTI ug PhilSEED, nga nagtumong sa paghatag og mas daghang oportunidad ug dugang panginabuhian sa mga lokal nga mag-uuma.
Pinaagi sa Shared Service Facility nga gitugyan sa DTI ngadto sa PhilSEED, mahimo nang dal-on sa mga mag-uuma ang ilang mga cacao beans nga maayong pagka-ferment ug gipauga aron maproseso ngadto sa mga produktong sama sa tableya ug tsokolate. Kini usa ka lakang aron mas mapataas ang kantidad sa ilang mga ani ug madugangan ang ilang kita.
Gilauman nga sa umaabot, makabaton ang Zamboanga Sibugay og nagkalain-laing klase sa single-estate tableya ug chocolate brands nga pagapanag-iyahan ug pagahimoon mismo sa mga mag-uuma. Pinaagi niini, dili na lamang sila magsalig sa pagbaligya sa hilaw nga cacao beans, kondili makasulod na usab sa pagproseso ug pagbaligya sa mga nahuman nang produkto.
Atol sa ceremonial signing nga gipahigayon niadtong Nobyembre 16 sa PhilSEED Farm, Barangay Gomotoc, Titay, gipahayag ang pagpasalamat sa suporta sa DTI Region IX ubos sa pagpangulo ni Regional Director Engr. Al-Zamir I. Lipae, lakip na sa DTI Zamboanga Sibugay nga gipangulohan ni Provincial Director Ma. Rovie L. Manzanares.
Ang maong panag-uban nagsugod duha ka tuig na ang milabay sa Barangay Guinoman ug karon gipalapdan pa alang sa kaayohan sa mga komunidad nga nag-uma og cacao. Gilauman nga pinaagi sa padayon nga kooperasyon sa gobyerno, pribadong sektor ug mga mag-uuma, mas mapalig-on ang lokal nga industriya ug mahatagan og oportunidad ang mga mag-uuma nga mahimong mga prodyuser ug tag-iya sa ilang kaugalingong mga brand nga mapasigarbo sa tibuok probinsya.










