Opisyal nang gilunsad sa lokal nga panggamhanan sa Ipil ang Drug Abuse Prevention and Control o DAPC Week 2026 atol sa flag-raising ceremony isip pagpalig-on sa kampanya batok sa pag-abuso ug paggamit sa ilegal nga droga.
Gipadayag ni Municipal Mayor Ramses Troy Olegario, uban ni Municipal Government Local Operations Officer Harby Hope Tagong, ang suporta sa LGU Ipil alang sa pagpalambo sa usa ka drug-free ug luwas nga palibot sa trabahoan ug sa tibuok komunidad.
Isip pagpakita sa ilang panaghiusa, mipahigayon ang mga kawani sa munisipyo og panumpa ug pagpirma sa DAPC Freedom Wall pinaagi sa Signature Campaign. Kini nagsimbolo sa ilang personal ug kolektibong pasalig nga mosuporta sa mga programa ug kalihokan batok sa ilegal nga droga.
Pinaagi sa maong kampanya, gipasiugda nga ang paglikay sa pag-abuso sa droga dili lamang responsibilidad sa kapulisan ug panggamhanan, kondili apil usab ang matag empleyado, pamilya ug komunidad.
Gilauman nga pinaagi sa padayon nga paghatag og kahibalo, disiplina ug aktibong partisipasyon sa katawhan, mas mapalig-on ang paningkamot nga mapanalipdan ang kahimsog, kaluwasan ug kaugmaon sa matag pamilyang Ipilinyo.










