Gipalig-on sa Bureau of Fisheries and Aquatic Resources o BFAR ang kahibalo ug kahanas sa mga asosasyon sa mga mangingisda sa Zamboanga Sibugay pinaagi sa pagpahigayon og capability training sa pag-alima og bangus gamit ang marine fish cages niaging adlaw.
Kabahin kini sa Fish Cage Intervention Program sa BFAR nga naghatag og fish cage facilities ug teknikal nga tabang ngadto sa mga organisadong asosasyon sa mangingisda aron mapalambo ang ilang panginabuhian ug mapadaghan ang ilang produksyon sa bangus.
Lakip sa nakadawat og fish cage facilities ang Sinama Indigenous People Fisherfolks Association sa Payao, ingon man ang Tandiong Muslim Fish Cage 1 and 2 Association ug Pandan Pandan Fisherfolk Workers’ Association sa Alicia.
Atol sa pagbansay, gitudloan ang mga partisipante sa saktong pamaagi ug mga batakang prinsipyo sa pag-alima og bangus sulod sa fish cages, lakip ang hustong pagdumala sa mga pasilidad aron masiguro ang maayong produksyon. Gilauman nga pinaagi niini, mas mapalambo ang kahibalo sa mga mangingisda ug makahatag og dugang kita ug mas lig-on nga panginabuhian sa ilang mga pamilya.










