Naugdaw ang lima ka balay human gilamoy sa kalayo sa Purok 4E, Barangay Apokon, Tagum City, gabie niadtong Nobyembre 13, 2026. Subay sa pakighinabi sa Juander Radyo Tagum News team kang SFO1 Rommel Valencia, Chief IIS sa Bureau of Fire Protection Tagum, nga paspas sumala pa mikuyanap ang kalayo, diin sagad sa mga naapektuhang residente walay nasalbar nga mga butang.
Gibutyag sa usa sa mga nasunogan, nga nagsugod ang kalayo sa usa ka balay nga giingong wala ang mga tag-iya, una pa kini mikuyanap sa mga kasikbit nga kabalayan.
Hinuon, walay naangol o namatay sa maong insedente samtang dali kining nakontrol sa mga bombero ug napugngan ang dugang unta nga kadaut sa mga naglinya nga panimalay nga sagad gama usab sa mga light materials.
Giklaro ni SFO1 Valencia nga padayon pa ang ilang imbestigasyon aron matino ang kinatibuk-ang damyos ug ang hinungdan sa naasoy nga panghitabo.










