Giklaro sa Department of Transportation (DOTr) nga dili angay kahadlokan sa mga drayber ang mga checkpoint nga gipahigayon sa Land Transportation Office (LTO), hinunoa kabahin kini sa mga lakang aron mapalig-on ang disiplina ug kaluwasan sa kadalanan.
Matud ni DOTr Regional Director Atty. Aisa Alonto, kabahin sa mandato sa LTO ang pagpatuman sa mga balaod ug regulasyon sa trapiko pinaagi sa regular nga inspeksyon ug checkpoint operations.
Gipasabot ni Alonto nga dili tumong sa maong mga operasyon nga hadlok-hadlokon ang mga motorista, kondili pagsiguro nga ang mga sakyanan ug ilang mga drayber nagsunod sa mga gikinahanglang dokumento ug sumbanan sa kaluwasan.
Pinaagi sa mga checkpoint, masuta ang mga posibleng paglapas sa balaod sa trapiko, lakip na ang pagdrayb nga walay balidong lisensya, rehistro sa sakyanan ug uban pang dokumento nga gikinahanglan sa balaod.
Giawhag usab ang mga drayber nga kanunay andam ang ilang mga dokumento, mosunod sa mga balaod sa trapiko ug makigtambayayong sa mga personnel sa LTO atol sa inspeksyon.
Gipasiugda nga ang responsableng pagdrayb ug kooperasyon sa mga motorista importante aron malikayan ang mga aksidente ug mapanalipdan ang kinabuhi sa tanang naggamit sa kadalanan.










