Nadakpan sa mga operatiba sa Ormoc City Police Office (OCPO) ang usa ka 24 anyos nga lalaki nga giilang si alyas “Zen,” usa ka ulitawo ug residente sa brgy. San-juan ning dakbayan, nga giklasipikar isip Street-Level Individual (SLI) atol sa buy-bust operation nga gihimo didto sa naasoy nga lugar niadtong nakalabay nga adlaw.
Nasakmit atol sa operasyon ang unom ka transparent plastic sachet nga adunay puti nga kristal nga substansiya nga gituohang shabu, nga may gibug-aton nga 1.4 gramos ug gibanabanang kantidad nga ₱9,520, base sa Dangerous Drugs Board (DDB) valuation. Nakuha usab sa mga otoridad ang ubang personal nga mga butang sa suspek ug boodle money nga gigamit sa operasyon.
Gimarkahan, giimbentaryo ug gidokumento sa mga operatiba ang tanang nakompiskang ebidensiya sa lugar sa pagdakop, subay sa gitakdang legal nga pamaagi ug diha sa presensya sa suspek ug mga gikinahanglang saksi.
Human sa pagdakop, gipahibalo ang suspek sa iyang mga katungod ubos sa Miranda Doctrine gamit ang pinulongang iyang nasabtan. Gidala siya sa OCPS3 alang sa dokumentasyon ug tukmang disposisyon.
Sa pagkakaron, anaa na sa kostodiya sa kapulisan ang suspek ug gilauman nga pasakaan og kaso tungod sa paglapas sa Sections 5 ug 11, Article II sa Republic Act No. 9165 o Comprehensive Dangerous Drugs Act of 2002.
Photo courtesy: OCPO










