Patay ang usa ka 27-anyos nga construction worker human gipusil sa usa ka suspek samtang nagtrabaho sa construction site daplin sa national highway sa Calbayog City, Samar, niadtong nakalabay nga adlaw, diin dali usab nga nadakpan ang giingong suspek sulod sa duha ka oras nga hot pursuit operation sa kapulisan.
Base sa inisyal nga imbestigasyon sa Police Regional Office 8 (PRO-8), giila ang suspek sa alyas nga “Sadam” nga giingong migamit og kalibre .45 nga armas sa pagpamusil sa biktima, sa wala pa mokalagiw sakay sa motorsiklo padulong sa agricultural area sa Barangay Dinagan, Oquendo District, Calbayog City. Nadakpan siya sa mga operatiba sa Calbayog City Police Station, kauban ang 1st Samar Provincial Mobile Force Company ug Provincial Intelligence Unit, alas 10:20 sa buntag sa samang adlaw, diin narekober usab ang armas nga gituohang gigamit sa krimen.
Niadtong Nobyembre 11, gisang-at batok sa suspek ang reklamong Murder ubos sa Article 248 sa Revised Penal Code pinaagi sa inquest proceedings atubangan sa Office of the City Prosecutor sa Calbayog City. Gidala usab siya sa Calbayog City Police Station human sa pagkadakop alang sa hustong disposisyon.
Photo courtesy: PRO 8










