Gihatagan og kahibalo bahin sa pagpangandam sa kalamidad ug mga katungod sa kabataan ang mga batan-on sa lungsod sa Mawab atol sa Children’s Congress 2026 nga gipahigayon sa Old Rural Health Unit (RHU) Building niadtong Nobyembre 14, 2026 .
Kabahin sa kalihokan ang Disaster Awareness Orientation and Workshop diin gitudloan ang mga partisipante sa mga angay buhaton panahon sa emerhensiya ug kalamidad, lakip na ang kahibalo sa ilang mga katungod isip kabataan.
Nalipay usab si Mawab Mayor Myrill Apit sa aktibong pag-apil sa mga kabatan-onan sa maong kalihokan nga gatumong sa pagpalapad sa ilang kahibalo ug pagpalig-on sa ilang kaandam sa pag-atubang sa mga kalamidad.
Gipadayag usab niya ang pagpasalamat sa Municipal Disaster Risk Reduction and Management Office (MDRRMO), Municipal Social Welfare and Development Office (MSWDO) ug sa tanang mitabang sa pagpahigayon sa kalihokan.
Pinaagi niini, gilauman nga mas mapalambo ang kahibalo ug partisipasyon sa kabataan sa pagpalig-on sa kaluwasan ug pagpanalipod sa ilang mga katungod sa komunidad.









