Mokabat sa P162,524,439.00 nga kantidad sa delikadong shabu, marijuana, ug expired nga mga tambal ang gigun-ob atol sa Destruction of Dangerous Drugs nga gihimo sa Libertad Power and Energy Corporation (LPEC) sa Barangay Commonwealth, Aurora, Zamboanga del Sur pinaagi sa thermal destruction karong hapon, Nobyembre 12, 2026.
Ang kalihukan gipangunahan sa Philippine Drug Enforcement Agency (PDEA) 9 pinaagi ni Regional Director Bryan D. Babang kauban ang LPEC Chairman Former Governor Engr. Victor J. Yu, uban ni 1st District Representative Joseph Kim Yu.
Gikan sa kinatibuk-ang kantidad, P160,608,179.32 o katumbas sa 23.6 kilos niini ang drugang shabu, P1,096,078.83 o katumbas sa 9.1 kilos ang Marijuana, ug P820,181, 94 nga kantidad sa mga expired medicines gikan sa nagkadaiyang mga tambalanan sa rehiyon.
Ang mga delikadong druga naggikan sa mga nagkadaiyang sala sa korte sa Dipolog City, Zamboanga City, Pagadian City, Aurora, Zamboanga del Sur, Molave Zamboanga del Sur, ug sa Ipil Zamboanga Sibugay.
Sa mensahe ni Judge Joel Vercide, Presiding Judge sa Regional Trial Court (RTC) Branch 23, Molave, Zamboanga del Sur, ikatulo na nga pinakadakong destruction activity ang pagun-ob karong adlawa sa mga dangerous drugs.
Kini usa lang ka testamento sa dedikasyon sa mga personahe sa PDEA Region 9 sa ilang lig-on nga pakigbatok sa pagsumpo sa drugang shabu sa Zamboanga Peninsula Region.









