Mokabat sa kapin 80 ka personahe sa Tagum City Traffic Management Unit (TMU) ang i-deploy alang sa opisyal nga pagpasiga sa Giant Holiday Tree sa Tagum City karong Nobyembre 20, 2026 aron mag-monitor sa kalsada alang sa hapsay nga dagan sa trapiko.
Sa pakighinabi kang TMU Head and Executive Assistant III Francisco Jun Sevilles Jr. sa programang Juander Radyo Eksklusibo, nakatukok ang iyang mga personahe sa pagbantay sa gitaganang entrance sa mga sakayanan sa Fishers Cafe sa Apokon Road ingon man sa kadalanan nga maapektohan sama sa Crossing Curvada Magdum ug palibot sa City Hall aron han-ay ang pag-parking sa mga sakyanan ug dili makamugna og trapiko.
Dugang ni Sevilles mas gidoble nila ang ilang pagbantay aron masiguro nga han-ay ang dagan sa trapiko atol sa maong aktibidad sanglit lauman nga mas daghang tawo ang mobisita sa Tagum City Hall hilabi na anaa lamang duol sa holiday Tree nahimutang ang rides sa Carnival.
Giawhag usab ni Sevilles ang tanang mobisita nga anaa lamang sa duol nga mas maayong magbaklay aron dili makadugang sa pagdasok sa sakyanan ug dili okuparon ang kalsada kon magbaklay aron han-ay ang paggawas ug sulod sa mga sakyanan ug malikayan ang disgrasya.
Giklaro usab ni TMU head Sevilles nga andam sila sa tanang higayon nga manakop ang iyang personahe sa mga badlongon nga drayber.










