Mokabat sa dul-an usa ka milyon nga kantidad sa gidudahang shabu ang nasakmit sa awtoridad didto sa Barugo nga miresulta usab sa pagkadakop sa kapulisan sa ka giila nga No. 1 Regional Priority Target List (RPTL) ug High-Value Individual (HVI) sa illegal nga droga sa Eastern Visayas, kauban ang lima pa ka indibidwal, atol sa buy-bust operation sa Barugo, Leyte, niadtong nakalabay nga adlaw.
Ang nag-unang suspek giila lamang sa alyas nga “Sonnie,” 57 anyos ug residente sa Barugo. Lakip sa lima pa nga nadakpan ang duha ka menor de edad nga nalambigit sa balaod.
Sumala sa Leyte Police Provincial Office (LPPO), gisuportahan sa Barugo Municipal Police Station (MPS), ubos sa pagpangulo ni PMAJ Romeo Q. Sudario Jr., ang operasyon nga gipangunahan sa Regional Police Drug Enforcement Unit 8 (RPDEU8).
Nasakmit sa operasyon ang tulo ka heat-sealed transparent plastic sachet ug usa ka transparent plastic cellophane nga gihigot, nga adunay sulod nga gituohang shabu nga motimbang og kinatibuk-ang 134 gramos ug adunay gibanabanang kantidad nga ₱911,200, base sa Dangerous Drugs Board (DDB). Narekober usab ang usa ka kalibre .38 nga rebolber ug duha ka buhing bala.
Ang mga ebidensiya gimarkahan, gi-imbentaryo ug gikuhaan og litrato sa lugar nga gidakpan, atubangan sa mga nadakpan ug sa gikinahanglang mga saksi, lakip ang usa ka napiling opisyal sa barangay ug representante sa media, subay sa angay nga legal nga pamaagi.
Gidala ang mga nadakpan sa Barugo MPS alang sa dokumentasyon ug hustong disposisyon sa ilang kaso. Samtang, ang mga nasakmit nga gituohang ilegal nga droga gisumite sa PNP Regional Forensic Unit 8 (RFU8) alang sa chemical analysis aron mapamatud-an ang sulod niini. Ang dugang nga legal nga aksiyon magdepende sa resulta sa laboratory examination ug sa pagproseso sa kaso batok sa mga suspek, lakip ang hustong pagdumala sa duha ka menor de edad subay sa mga balaod nga nagpanalipod sa mga bata nga nalambigit sa balaod.
Photo courtesy: LPPO
