Angol ang usa ka 64 anyos nga asawa human giingong gidunggab sa iyang 67 anyos nga bana sa Barangay Datu-Tutukan, Dumingag, Zamboanga del Sur, niadtong nakalabay nga adlaw.Base sa inisyal nga imbestigasyon, giingong kalit lang ang pagpang-atake sa suspetsado ngadto sa biktima gamit ang usa ka Plamingko samtang naa kini sa usa ka tindahan.
Ang biktima nakaangkon og daghang samad sa dughan, likod ug wala nga kamot ug dali ra usab nga natabang pinaagi sa Punong Barangay sa lugar nga miresponde dayon sa hitabo. Gidala una ang biktima sa Dumingag Rural Health Unit ug dayon gibalhin sa ospital sa Ozamiz City alang sa dugang medikal nga atensyon tungod sa grabeng naangkong mga samad.
Naglusad usab dayon og hot pursuit operation ang kapulisan sa lugar nga misangpot sa pagdakop sa suspetsado diin nabawi usab gikan kaniya ang usa ka Plamingko nga gituohang gigamit sa insidente. Gi-andam na usab karon sa kapulisan ang kasong kriminal nga ipasaka ngadto sa suspetsado nga mihimo sa pagpangdunggab ngadto sa iyang asawa.
Photo Courtesy: ZSPPO
