Nagpadayon ang Philippine Rubber Research Institute (PRRI) sa paghatag og nagkalain-laing serbisyo ug programa aron mapalambo ang industriya sa goma ug matabangan ang mga mag-uuma sa nasod.
Matud sa ahensya, libre nilang gihatag ang mga dekalidad nga budded rubber seedlings ug nagpadayon usab sa pagpahigayon og mga teknikal nga pagbansay alang sa mga mag-uuma ug mga stakeholder sa industriya.
Naghatag usab ang PRRI og suporta sa pagtukod sa mga rubber nursery pinaagi sa pakigtambayayong sa mga lokal nga panggamhanan. Lakip sa mga lugar nga ilang natabangan karon ang mga lungsod sa Bayog ug Titay diin adunay mga nursery projects alang sa goma.
Dugang pa, naglunsad ang PRRI og mga capacity development trainings alang sa mga agriculture extension workers, farmer cooperatives, ug mga lider sa mag-uuma pinaagi sa Training of Trainers (TOT) program.
Sumala sa PRRI, ang mga nakagradwar sa TOT maoy mahimong pool of trainers nga motudlo usab sa ilang tagsa-tagsang komunidad aron mas daghang mag-uuma ang makakat-on sa modernong teknolohiya sa pagpanguma sa goma.
Gituohan sa ahensya nga pinaagi sa maong pamaagi, mopadayon ang pagdaghan sa mga adunay kahibalo sa improved rubber production technology ug mas mapalig-on ang industriya sa goma sa umaabot.
Photo Courtesy: Agriculture Monthly
