Gimando sa Cybercrime Investigation and Coordinating Center (CICC) ang temporaryong pag-block sa sikat nga online game nga “GoreBox” isip usa ka precautionary measure samtang nagpadayon ang imbestigasyon sa nahitabong pagpamusil sa San Jose National High School sa Tacloban City niadtong Lunes, Hunyo 22.
Sumala ni Aboy Paraiso sa CICC, gihimo ang maong lakang human migawas sa inisyal nga report sa Police Regional Office 8 (PRO-8) nga usa sa mga menor de edad nga suspek giingong naadik sa maong bayolenteng dula, ug gipahayag niya nga dili pwedeng pasagdan ang posibleng dako nga impluwensya sa online content ngadto sa kabatan-onan.
Tumong sa CICC sa maong mas lapad nga pagsusi nga matino kon aduna ba gayud direktang kalambigitan ang gaming application sa nahitabong krimen.
Tungod sa kaseryoso sa insidente, gikatakda usab ang usa ka imbestigasyon sa Senate Committee on Women, Children, Family Relations, and Gender Equality karong Hulyo 1 aron hisgutan ang papel sa mga online platform ug ang kapeligrohan sa pagka-expose sa mga batan-on ngadto sa mga bayolenteng impluwensya sa internet
Photo Courtesy: Steam
