Gipang-atiman na karon sa City Plant Nursery ang mga nakolektang liso sa “Gold Tree” ug similya sa “Pink Tree” aron ipang-apod-apod og libre ngadto sa mga lungsuranon alang sa greening program sa syudad sa Malaybalay.
Gipang-harvest ang maong mga binhi sa City Environment and Natural Resources Office (City ENRO) ning bulan sa Hunyo 2026, gikan sa mga hamtong nga kahoy sulod sa compound sa Bukidnon National High School (BNHS) diin giisip kining dako og kabililhon tungod kay ang mga Gold Tree sa BNHS nailang “mother trees” diin ang mga liso niini naggikan pa kaniadto sa Hawaii ug usa sa mga orihinal nga natanom sa tunghaan.
Nahimong hapsay ug luwas ang maong operasyon tungod sa pagtinabangay sa nagkalain-laing ahensya. Nagpahulam ang Bukidnon II Electric Cooperative, Inc. (BUSECO) og man lifter aron maabot ang tumoy sa mga tag-as nga kahoy, samtang ang mga personahe sa City ENRO Anti-Illegal Logging Task Force mao ang nisaka sa kahitas-on aron sa pagpangolekta. Gidumala usab sa mga Traffic Enforcer ang dagan sa trapiko sa highway aron masiguro ang kaluwasan sa tanan samtang gihimo ang operasyon.
Tungod sa kalampusan sa maong buluhaton, nagpaabot og dako nga pasalamat ang City ENRO ngadto sa pagdumala sa BNHS ug sa tanang ahensya nga niamot sa ilang panahon ug kagamitan. Sa pagkakaron, gipasalig sa buhatan nga ilang amomahon og maayo ang mga similya hangtod nga moabot kini sa saktong gidak-on ug andam na nga ipanghatag nga walay bayad sa publiko nga gustong motabang sa pagpapanindot sa palibot sa syudad
Photo Courtesy: City ENRO Malaybalay
