Nagpahigayon og coordination meeting ug onsite inspection ang City Government of Valencia niadtong Hunyo 23, 2026, aron hingpit nga mapalig-on ang seguridad ug mapalambo ang Pantad sa Purok 11, Barangay Poblacion isip usa ka cultural ug eco-tourism site sa dakbayan. Ubos sa liderato ni Mayor Amie Galario—uban sa suporta ni City Spokesperson Jun Galario, Konsehal Rolando Centillas Jr., ug BCLA President Allan Alcontin—gitinguha sa lokal nga kagamhanan nga himoong luwas, organisado, ug mapasigarbohong dapit ang Pantad alang sa mga residente ug mga bisita.
Usa sa mga nag-unang prayoridad sa maong lakang mao ang pagsumpo sa mga daotang kalihokan nga posibleng makaimpluwensya sa kabatan-onan pinaagi sa pag-instalar og outpost, dugang mga suga, pagpahigayon og cleanup, ug pag-deploy og mga kapulisan, auxiliaries, ug crime watch volunteers nga magpatrolya sa dapit. Gawas niini, magpasiugda usab og mga polisiya ug ordinansa sama sa pagtakda sa oras sa pagbisita ug paggamit og logbook system aron hugot nga makuha ang monitoring ug mapugngan ang kriminalidad.
Gawas sa aspeto sa seguridad, gisiguro sa kagamhanan nga ang mga bag-ong regulasyon magsubay gihapon sa pagrespeto sa kultural ug tradisyonal nga mithi sa Pantad, ilabina kay nagsilbi kini nga opisyal nga ritual ground sa mga Indigenous Peoples (IPs). Human sa panag-istorya, personal nga gisusi sa mga opisyal ang maong dapit aron daling matino ang mga prayoridad nga proyekto ug mga interbensyon nga kinahanglanon alang sa malahutayong kalamboan sa maong dapit
Photo Courtesy: City Government of Valencia
