Patay ang usa ka 65-anyos nga lola human nga gitigbas ang liog sa lalaking pag-umangkon didto sa Purok 4, Sitio Litab, Brgy. Balubo, lungsod sa Roxas, Zamboanga del Norte, kagahapong adlawa, Mayo 3, 2026.
Giila ang biktima nga si Salina Selino, balo samtang ang suspetsado nga pag-umangkon, 32-anyos, ulitawo ug parehong residente sa nasangpit nga dapit.
Base sa inisyal nga imbestigasyon sa kapulisan, natigayon ang panaglalis sa duha nga matod pa nagsumikad sa personal nga kasuko. Tunga-tunga sa panaglalis mihulbot ang suspect sa sundang ug gitigbas-tigbas ang liog ug ulo sa biktima nga maoy hinungdan sa hinanaling kamatayon.
Matod pa sa nahinabi nga silingan, aduna matod pay problema sa pangisip ang suspek ug magtukar-tukar ang iyang kondisyon.
Nadakpan ra usab ang suspetsado sa mga mirespondeng kapulisan sa lugar sa insidente ug kasamtangang anaa tingkagol sa selda sa Roxas Municipal Police Station alang sa tukmang disposisyon.
