Gikabalak-an karon ang kalit nga pagkahuyang sa lokal nga kwarta human sa trading kagahapon adlawa Martes, Abril 28, 2026, sa makasaysayanong pagtaas nga Php61.30 batok sa usa ka US dollar. Nagsugod ang trading sa maong adlaw sa kantidad nga 60.80 pesos. Apan padayon kining miubos hangtod nga nalapas na ang gitawag nga “psychological barrier” nga 60 pesos.
Sumala sa mga eksperto, ang nagpadayon nga gubat sa Middle East maoy usa sa mga nag-unang rason niining serye sa pagkahagsa sa kantidad sa peso. Samtang duna’y gamay nga bentaha alang sa mga pamilya sa mga OFW nga makadawat og mas dako nga peso sa ilang padala, mupait usab ang kahimtang tungod sa pagsaka sa presyo sa mga imported nga palitonon sama sa lana, pagkaon, ug abono.
Tungod kay ang Pilipinas nagsalig pag-ayo sa mga imported nga produkto, ang huyang nga peso gilauman nga mosangpot sa mas taas nga inflation o pagsaka sa presyo sa mga palitonon sa merkado. Dugang pa niini, mas mmutaas usab ang pagbayad sa utang sa nasud ngadto sa mga langyaw nga tigpahulam tungod kay dolyar man ang basehan sa pagbayad.
Photo Courtesy: Businessworld
