Nagpahimangno ang Lokal nga pangagamhanan sa syudad sa Iligan og ang mga otoridad batok sa ilegal nga paggamit sa fine mesh nets sa pagpangisda, nga giila karon isip usa sa nag-unang hinungdan sa pagkahurot sa gagmay pang isda ug pagkadaot sa marine ecosystem.
Sumala sa Republic Act No. 8550, klaro nga gidili ang paggamit og mga pukot nga adunay mesh size nga mas gamay kaysa gitugotan nga sukod sa Department of Agriculture.
Ang maong balaod nagtumong sa pagpanalipod sa mga isdang wala pa makatubo ug wala pa makapanganak—usa ka kritikal nga aspeto sa pagmintinar sa kadagaya sa atong kadagatan.
Gipasabot sa mga fisheries enforcers nga ang paggamit sa fine mesh nets nagpasabot nga bisan ang mga gagmay pa kaayong isda ug uban pang marine species madakpan, nga mosangpot sa dugayng problema sa suplay sa isda ug panginabuhian sa mga mangingisda.
Nag-awhag ang gobyerno sa tanang mangingisda nga mosunod sa hustong regulasyon ug gamiton lamang ang aprubadong pukot aron maprotektahan ang kadagatan ug masiguro ang padayon nga panginabuhian sa umaabot nga henerasyon.
