Maghost ang Pilipinas sa unang Southeast Asian Plus Youth Games, kini usa ka regional sports event alang sa Under-17 nga mga atleta, nga gikatakdang ipahigayon Disyembre 2 hangtod 14, 2027.
Ang presidente sa Philippine Olympic Committee, si Abraham Tolentino, maoy mahimong founding president sa maong organisasyon, samtang ang chairman sa Philippine Sports Commission nga si Patrick Gregorio maoy mangulo sa Local Organizing Committee.
Sumala ni Tolentino, tumong sa maong kompetisyon nga mapalig-on ang grassroots sports development ug maandam ang mga batan-ong atleta sa mas dagkong kompetisyon sama sa Asian Youth Games ug Southeast Asian Games.
Apil sa mga nasud sa Association of Southeast Asian Nations nga gilaum moapil ang Brunei, Cambodia, Indonesia, Laos, Myanmar, Malaysia, Thailand, Singapore, Timor-Leste, ug Vietnam. Ang “plus” nagpasabot sa pag-apil sa ubang nasud sa Asia sama sa Japan, South Korea, Qatar, Saudi Arabia, Nepal, Bhutan, Bahrain, Kyrgyzstan, Sri Lanka, Taiwan ug Turkmenistan.
Naglakip ang mga dula sa aquatics ug athletics isip mandatory sports, samtang uban pa nga events ang basketball, boxing, judo, taekwondo, triathlon, tennis, gymnastics, skateboarding, fencing, ug wrestling. Apil usab ang jiu-jitsu, billiards, dance sport, mixed martial arts, ug ang tradisyonal nga Filipino sport nga Arnis.
Photo Courtesy: Tiebreaker Times
