Nakaukit og bag-ong kasaysayan ang Filipina tennis star nga si Alexandra Eala human makasulod sa Round of 16 sa prestihiyosong BNP Paribas Open nga ginahimo sa Indian Wells Tennis Garden sa California.
Ang 20-anyos nga Filipina nakapildi sa world No. 4 nga si Coco Gauff sa iskor nga 6-2, 2-0, human kini miundang sa duwa tungod sa injury sa iyang bukton. Ang kadaugan nagpasabot sa unang higayon nga nakaabot si Eala sa Round of 16 sa maong torneyo nga giila usab nga “fifth Grand Slam” sa kalibutan sa tennis.
Gipakita ni Eala ang lig-on nga performance pinaagi sa madasigong serbisyo, disiplina sa baseline ug tukmang pagpahimutang sa bola nga nakahatag kaniya og kontrol sa duwa. Nakarekord usab siya og 96 porsiyento nga first-serve rate og napahimuslan ang lima sa unom ka break points batok sa iyang kontra.
Sa miaging duwa, napildi usab ni Eala ang Ukrainian player nga si Dayana Yastremska sa usa ka lisod nga tulo ka set nga panagsangka aron makasulod sa sunod nga round.
Sunod nga atubangon ni Eala sa Round of 16 ang Czech player nga si Linda Noskova, nga ika-14 seed sa maong torneyo.
Bisan pa sa dakong kalampusan, nagpadayon sa pagpakita og pagkamapainubsanon si Eala ug nagpasalamat sa suporta sa mga fans ug sa mga babaye nga nahimong inspirasyon sa iyang karera sa tennis.
Photo Courtesy: Business World
