Nagpadayon ang Department of Trade and Industry o DTI–Zamboanga Sibugay sa ilang regular nga price monitoring aron masiguro nga nasunod ang hustong presyo sa mga palaliton sa mga merkado ug tindahan sa probinsya.
Sumala sa DTI Sibugay, kabahin kini sa ilang programa aron maprotektahan ang mga konsumidor batok sa sobra nga presyo ug aron masiguro nga ang mga negosyante nagasunod sa Suggested Retail Price o SRP sa mga batakang panginahanglan.
Gipahigayon ang monitoring sa nagkadaiyang merkado, grocery stores, ug sari-sari stores sa lain-laing lungsod sa Zamboanga Sibugay. Gi-check sa mga personnel sa DTI ang presyo sa mga batakang palaliton sama sa bugas, de lata, instant noodles, gatas, sabon, ug uban pang basic commodities.
Matod pa sa ahensya, pinaagi sa kanunay nga pagmonitor sa presyo, masiguro nga walay mga negosyante nga magpahimus sa mga konsumidor pinaagi sa sobra nga pagpataas sa presyo.
Gidasig usab sa DTI ang mga konsumidor nga mahimong mapanagmatngon sa ilang pagpalit ug sundon ang SRP sa mga produkto. Kung adunay makita nga paglapas sa presyo, mahimo silang magreport sa pinakaduol nga opisina sa DTI.
Padayon ang panawagan sa DTI Sibugay sa mga negosyante nga mosunod sa hustong presyo aron mapadayon ang patas nga pamaligya ug maprotektahan ang interes sa publiko.
Photo Courtesy: DTI–Zamboanga Sibugay FB Page
