Hugot nga gi-awhag sa probinsyal nga panggamhanan sa Surigao del Sur ang tanang katawhan ug mga negosyante nga mahimong responsable sa pagbayad sa husto nga buhis ngadto sa Bureau of Internal Revenue (BIR).
Sumala kang Governor Johnny Pimentel, importante ang pagbayad sa buhis tungod kay kini maoy usa sa nag-unang tinubdan sa pondo sa gobyerno alang sa pagpatuman sa nagkadaiyang programa ug proyekto para sa kaayohan sa katawhan.
Gipahayag usab sa gobernador nga ang probinsyal nga panggamhanan nagpakita og bug-os nga suporta sa mga kampanya ug panawagan sa BIR aron mapalig-on ang kahibalo sa publiko bahin sa ilang responsibilidad isip mga taxpayer.
Dugang pa niya, ang mga buhis nga mabayran sa katawhan magamit sa pagpondo sa mga proyekto sa imprastraktura, mga serbisyo publiko, ug uban pang nag-unang panginahanglan sa gobyerno.
Gipatin-aw usab ni Pimentel nga dili lamang sa mga proyekto mapadulong ang buhis, kondili magamit usab kini sa paghatag og sweldo sa mga empleyado sa gobyerno ug sa pagpadagan sa nagkadaiyang serbisyo nga gihatag sa publiko.
Tungod niini, nag-awhag ang opisyal sa tanang mga taxpayer nga motuman sa ilang obligasyon sa pagbayad sa husto ug tukmang buhis aron makatabang sa padayon nga kalamboan sa probinsya ug sa nasud.
