Tulo ka High-Value Individuals (HVTs) ang nadakpan samtang nabungkag ang drug den sa usa ka buy-bust operation nga gihimo sa kapulisan ug sa Philippine Drug Enforcement Agency (PDEA) kagahapong adlawa, Marso 6, 2026, alas 3:26 sa hapon sa Purok 3 Barangay Magosilom, Cantilan.
Sa maong operasyon, nadakpan ang mga suspek nga si alyas “Josh,” 36-anyos, ulitawo ug residente sa Purok 3, Brgy. Magosilom, nga giila isip Target-Lister ug High-Value Individual; alyas “Mike,” 39 anyos, minyo ug drayber, residente usab sa maong lugar; ug alyas “Ren,” 35- anyos, minyo ug mag-uuma, residente sa Purok 1, National Highway, Brgy. Calagdaan, Cantilan. Ang tulo ka suspek giila usab nga mga High-Value Individual sa anti-illegal drug campaign sa kapulisan. Samtang padayon pang gipangita sa mga awtoridad ang usa pa ka suspek nga nailhan sa alyas nga “Leo,” nga giingong residente usab sa Purok 3, Brgy. Magosilom.
Atol sa operasyon, nakumpiska sa mga operatiba ang pipila ka heat-sealed transparent plastic sachet nga adunay crystalline substance nga gituohang shabu nga adunay gibanabana nga gibug-aton nga walo ka gramo ug kantidad nga mokabat sa ₱54,400. Narekober usab ang usa ka folded aluminum foil nga adunay residue sa gituohang iligal nga droga ug pipila ka bakanteng plastic sachet nga adunay lama sa shabu.
Ang tanang nakumpiskang ebidensya husto nga gimarkahan ug gi-inventory subay sa standard nga pamaagi ug karon anaa na sa kustodiya sa Cantilan MPS alang sa hustong dokumentasyon ug disposisyon.
Giandam na sa kapulisan ang pagsang-at og kaso batok sa mga nadakpan nga suspek tungod sa paglapas sa Sections 5, 6, 7, 11, 12 ug 15 sa Article II sa Republic Act 9165 o ang Comprehensive Dangerous Drugs Act of 2002.
Photo courtesy: PDEA-13
