Sobra sa 101 ka tripulante ang gikatahong nawala human nalubog ang Iranian Navy frigate nga IRIS Dena (75) sa gawas sa teritoryal nga katubigan sa Sri Lanka niadtong Miyerkules.
Sumala ni Sri Lanka Foreign Minister Vijitha Herath, naluwas sa ilang hukbong dagat ug himpapawid ang 32 ka samaran nga mga mandaragat, diin kasagaran kanila anaa sa kritikal nga kondisyon. Nahitabo ang insidente samtang pauli na ang barko gikan sa MILAN 2026 International Fleet Review nga gipahigayon didto sa India.
Dali nga gidala ang mga naluwas nga tripulante sa ospital sa Galle diin padayon silang giatiman sa mga doktor.
Bisan pa man duna’y mga report nga nag-ingon nga gitorpedo sa usa ka submarino ang barko, wala pa gihapon masuta kon unsa nga nasud ang responsable sa pag-atake. Ang pagkalunod sa IRIS Dena naghatag og dakong kabalaka sa rehiyon, ilabi na nga dungan kini sa nagkagrabe nga tensyon sa Middle East.
Photo courtesy: Daily pioneer
