Patay ang unom ka sundalong Amerikano human maigo sa missile strike sa Iran ang usa ka military facility sa Estados Unidos sa Kuwait.
Una nang gireport sa US Central Command nga tulo ang namatay, apan nadungagan pa kini human namatay ang usa sa mga nasamdan ug adunay duha pa ka patay’ng lawas nga narekober sa mga nahugnong gambalay.
Matod ni US Defense Secretary Pete Hegseth, miigo ang missile sa usa ka “tactical operations center” nga adunay fortification, human makalusot sa air defense system ang missile nga kabahin sa pagbalos sa Iran.
Kini ang unang kumpirmadong mga namatay sa US sa kasamtangang tensyon sa Iran. Kapin 13,000 ka sundalong Amerikano ang naka-deploy sa Kuwait isip kabahin sa dugay na nga relasyong panseguridad sa duha ka nasud.
Padayon ang pagtaas sa tensyon sa Middle East dungan sa pagbinayloay og mga pag-atake tali Iran ug mga kaalyado sa Amerika.
Photo Courtesy: PBS
