Nagpasidaan ang Philippine Exporters Confederation Inc. (Philexport) nga posibleng adunay lapad nga epekto sa global supply chain ang nagkagrabeng tensyon sa Middle East, human sa pag-atake sa Iran sa United States ug Israel ug ang gisundan niini nga pagpanimalos.
Sa pahayag sa grupo niadtong Domingo, gibutyag nga ang pag-target sa mga nasud sa Middle East nga adunay base militar sa US ug ang paghugot sa seguridad sa Strait of Hormuz nakaapekto na sa airspace ug logistics operations, samtang misaka ang volatility sa energy markets.
Sumala sa Philexport, ang mas hinay nga pagtubo sa ekonomiya ug mas taas nga gasto mahimong makaapekto sa dagan sa global nga pamatigayon.
Alang sa Pilipinas, nga dako og giangkat nga lana, ang pag-usbaw sa presyo sa krudo direktang mosangpot sa mas mahal nga gasto sa produksyon, transportasyon ug logistics. Kini posibleng makapaluya sa price competitiveness sa mga produktong Pilipino sa merkado sa kalibutan.
Lakip sa mga sektor nga posibleng labing maapektuhan mao ang electronics, garments, processed food ug furniture, nga mahimong moatubang sa mas taas nga shipping rates, insurance premiums ug mas dugay nga transit time kon mausab o malangan ang mga ruta sa pagpadala.
Photo Courtesy: Pilipino Mirror
