Sikop ang usa ka 16-anyos nga lalaki sa mga sakop sa kapulisan sa Tagum human kini gipasanginlan nga nanghulga’g patayon ang silingan sa Purok 5, Barangay San Miguel, niadtong nakalabay nga adlaw.
Sumala sa imbestigasyon sa Tagum City Police Station (CPS), giila ang biktima nga si alyas Evelyn, 60-anyos, minyo ug residente sa giingong lugar, naglingkod sa terrace sa iyang balay dihang kalit mitungha ang menor de edad nga silingan. Ang dinakpan, nga giila isip Child in Conflict with the Law (CICL), nagdalag sundang ug misinggit og nanghulga sa biktima.
Tungod sa kahadlok, midagan dayon ang biktima pasulod sa iyang balay samtang ang menor misulay pa og abli sa pultahan. Usa ka silingan ang miduol ug mipahimangno sa suspek nga undangon ang iyang gibuhat aron malikayan ang mas grabeng insidente. Tungod niini, nahadlok ang batan-on, gilabay ang sundang ug midagan pauli sa ilang balay.
Ang menor de edad ug ang nakompiskang sundang giturn-over sa Women and Children Protection Desk (WCPD) alang sa hustong pagdumala sa kaso. Nakigkoordinar usab ang kapulisan sa Local Social Welfare and Development Office (LSWDO) alang sa angay nga interbensyon ug assessment sa maong bata-on.
Photo Courtesy : WCPD tagum
