Naghimo og kasaysayan ang usa ka 10-anyos nga batang lalaki sa China human siya midaog sa kaso batok sa iyang kaugalingong amahan tungod sa paggamit sa iyang natigom nga “red envelope” o hongbao nga kwarta alang sa ikaduhang kaminyoon niini.
Sa tradisyon sa China matag Lunar New Year, ang mga bata makadawat og kuwarta sulod sa pula nga sobre nga gitawag og hongbao. Kini nga mga halad nga kwarta giisip nga personal nga kabtangan sa bata, bisan pa og ginikanan ang nagdumala niini.
Sumala sa report, ang bata nakatigom og dako nga kantidad sulod sa pila ka tuig ug gibutang kini sa bank account nga ginadumala sa iyang amahan. Apan human magbulag ang iyang mga ginikanan ug mopuyo siya uban sa iyang inahan, nadiskubre nga ang amahan mikuha og 82,750 yuan (mokabat og $11,500) gikan sa account sa bata.
Ang maong kantidad giingong gigamit sa pagbayad sa mga gastohan alang sa kasal sa amahan.
Tungod niini, mitabang ang inahan sa bata sa pagpasaka og kaso batok sa amahan, nga nag-angkon nga ang maong kwarta legal nga gipanag-iyahan sa bata.
Sa desisyon sa korte, gipaboran ang bata ug giila nga ang kwwarta gikan sa hongbao personal niyang kabtangan nga protektado sa balaod. Gisugo ang amahan nga ibalik ang tibuok kantidad lakip ang interes.
Photo Courtesy: Tribune Trends
