Nagpatawag og emergency meeting si Cebu Provincial Gobernador Pamela S. Baricuatro aron hisgutan ang mga lakang sa pagpangandam taliwala sa nagkagrabeng tensyon tali sa Estados Unidos ug Iran nga posibleng makaapekto sa suplay ug presyo sa lana sa tibuok kalibutan.
Human sa maong panagtigum, gipagawas ang Executive Order No. 15 nga nagmando sa tanang opisina sa Kapitolyo sa pagpatuman og mga pamaagi sa pagdaginot sa konsumo sa gasolina, lakip ang pagminus sa dili kinahanglanong biyahe aron masiguro ang responsableng paggamit sa suplay ug kaandam sa posible nga krisis sa lana.
Gimanduan usab ang matag departamento sa pagpasaka sa ilang kaugalingong plano sa fuel conservation isip kabahin sa hiniusang tubag sa probinsya.
Gipatin-aw sa maong mando nga dili maapil sa restriksyon ang mga serbisyong pang-emergency ug kritikal sama sa ambulansya, disaster response operations, ug emergency social services aron mapadayon ang paghatag og hinungdanong serbisyo sa katawhan.
Samtang nagpadayon ang tensyon sa gawas nasud, nag-andam usab ang kagamhanan sa probinsiya sa contingency support alang sa mga Overseas Filipino Workers nga posibleng maapektuhan ug mapugos og pauli sa nasud, aron masiguro nga aduna nay andam nga sistema sa tabang kon kinahanglanon ang repatriation.
Padayon usab ang koordinasyon sa Kapitolyo uban sa Department of National Defense, Department of Foreign Affairs, Department of Migrant Workers ug uban pang national agencies alang sa dali nga pagpaambit sa impormasyon ug hustong pagpangandam sa angayng mga lakang sa pagtubag.
Gipasiugda sa gobernadora ang kamahinungdanon sa sayong pagpangandam, maampingong pagdumala sa mga resources, ug hiniusang aksyon aron mapanalipdan ang mga Sugboanon batok sa posibleng epekto sa ekonomiya ug humanitarian nga sitwasyon.
