Gipangandaman na karon sa Police Regional Office 10 ang pagsikop sa gitudlong suspek sa pagpatay sa usa ka babaye sa Initao, Misamis Oriental, sa higayon nga mogawas na ang warrant of arrest.
Sumala sa imbestigasyon, usa ka prominenteng politiko ang nalambigit sa kaso. Matod ni PNP-10 Regional Director Christopher Abrahano, dili basta-basta ang suspek kinsa adunay kapasidad nga mo-hire og mga banggiitang abogado.
Kahinumduman nga sa milabay’ng bulan, duha ka babaye ang gidala sa hilit nga bahin sa Barangay Tubigan sa Initao ug gipusil. Apan, milagrosong nakaluwas ang usa sa mga biktima nga nahimong yawe sa pag-uswag sa imbestigasyon.
Giklaro sa PRO-10 nga padayon ang operasyon aron masiguro ang pagdakop sa suspek, samtang giprotektahan ang buhing testigo alang sa iyang kaluwasan ug sa pagkab-ot sa hustisya.
Photo courtesy: RCADD PRO 10
