Nabungkag sa Philippine Drug Enforcement Agency (PDEA) ug Philippine National Police (PNP) ang sa usa ka dako nga tinagong laboratoryo sa paghimo og methamphetamine hydrochloride o mas nailang shabu sulod sa usa ka bodega sa Industrial Park, Barangay Veinte Reales, Valenzuela City.
Nahimong malampuson ang operasyon pinaagi sa usa ka buy-bust operation nga gihimo sayo sa buntag niadtong Pebrero 22, 2026, mga alas 4:15 sa kaadlawon. Pinaagi sa hiniusang operatiba gikan sa PDEA Regional Office IV-A, Cavite Provincial Office ug PDEA Regional Office–National Capital Region, uban sa kooperasyon sa Valenzuela City Police Station, diin nakadakop sa usa ka suspek nga nailhang alias “JP,” 30-anyos, residente sa Cubao, Quezon City.
Nasikop ang suspek human kini mibaligya og 500 gramos nga gidudahang shabu nga adunay gibanabanang kantidad nga ₱3,400,000 ngadto sa usa ka undercover operative nga nagpakaaron-ingnong buyer.
Tungod niini nga transaksyon, nadiskubre sa mga otoridad ang maong shabu laboratoryo nga dugay nang gimonitor base sa mga naunang anti-drug operations. Sa misunod nga pag-raid sulod sa pasilidad, narekober ang 906.4064 ka kilo sa shabu nga nagkantidad og ₱6,163,563,520, ug 64.15 ka litro sa liquid methamphetamine nga nagkantidad og ₱436,220,000.
Nakuha usab ang ubang controlled precursors ug importanteng kemikal, lakip na ang nagkalain-laing laboratory equipment nga gigamit sa paghimo og ilegal nga droga. Sumala sa mga awtoridad, padayon ang imbestigasyon aron mahibal-an ang ubang posible nga kauban sa maong operasyon.
Photo Courtesy: PEOPLES TALIBA
