Giaprobahan sa Senate Committee on Electoral Reforms and People’s Participation ang anti-political dynasty bill diin dose (12) ka mga senador ang mipirma sa committee report, sumala sa pahayag ni Senate Deputy Majority Leader Risa Hontiveros niadtong Martes, Pebrero 24.
Si Hontiveros, kinsa chairperson sa komite, nagkanayon nga ang panel miuyon sa pagduso sa usa ka bersyon sa balaodnon nga magdili sa political dynasties hangtod sa ikaduhang ang-ang sa consanguinity (kadugo) ug affinity (paryente sa asawa o bana).
Ubos sa gisugyot nga balaod, ang mga suod nga miyembro sa pamilya — lakip na ang amahan, inahan, igsoon, kapikas, o anak — pagadid-an sa pagpapili alang sa publikong buhatan kung adunay laing miyembro sa pamilya nga kasamtangang nagpapili o naghupot na og elective nga posisyon.
Gawas kang Hontiveros, ang mga senador nga mipirma sa committee report sila si Erwin Tulfo, JV Ejercito, Kiko Pangilinan, Ping Lacson, Loren Legarda, Sherwin Gatchalian, Robin Padilla, Imee Marcos, Migz Zubiri, Bam Aquino, ug Lito Lapid.
Bisan pa man og ang orihinal nga sugyot ni Hontiveros tinguha nga idili ang political dynasties hangtod sa ikaupat nga ang-ang sa consanguinity, siya miingon nga abli siya sa mga kausaban sa panahon sa interpellations (pagpangutana sa senado).
Ang bersyon sa Senado nagbulag sa nasyonal ug lokal nga mga posisyon, pasabot nga ang mga paryente mahimong modagan sa nasyonal ug lokal nga mga pwesto sa dungan nga panahon. Apan, ang mga posisyon sa party-list pagadid-an kung ang usa ka political dynasty naggunit na og nasyonal o lokal nga buhatan.
Gidili usab sa lakang ang dungan ug sunod-sunod nga paghupot og posisyon sa mga miyembro sa pamilya.
Ang balaodnon nagpaila sa “right of first refusal” nga mekanismo, diin gikinahanglan ang mga pamilya nga magdesisyon sa ilang kaugalingon kung kinsa kanila ang modagan. Sa higayon nga dili magkasinabot, ang Commission on Elections (Comelec) ang adunay awtoridad sa pag-apil. Ang gisugyot nga balaod naghatag sa Comelec og gahum sa pagpatuman aron epektibong mapatuman ang pagdili.
Ang gisugyot nga balaod naglakip usab sa mga illegitimate children o kadtong mga anak gawas sa kaminyoon sulod sa ikaduhang ang-ang sa consanguinity. Ang mga managtiayon nga nagpuyo-puyo — bisan unsa pa ang civil status o sexual orientation, gender identity, expression, and sex characteristics (SOGIESC) — maapil usab sa pagdili.
Photo courtesy: Senate of the Philippines
