Sa usa ka istoryang murag salida apan tinuod nga panghitabo, usa ka wala pangalani nga trabahante sa Espanya ang nakadawat og kapin 55 mil dolyares nga bayad human siya gipahawa sa trabaho tungod sa pag-inom og hangtod tulo ka litro nga beer panahon sa lunch break.
Sumala sa mga dokumento sa korte, ang lalaki nga nagtrabaho sa usa ka electrical installation company gisuspetsahan sa iyang mga amo tungod sa iyang talagsaong pamatasan sa trabaho. Tungod niini, naghire ang kompanya og private detective aron sundan siya sulod sa oras sa trabaho. Sa report sa detective, nakita nga ang empleyado mag-inom og beer sa mga bar ug bisan sa parking lot. Sa usa ka insidente, nakahurot matod pa kini og tulo ka litro nga beer sa matag paniudto.
Tungod kay siya usab maoy nagmaneho sa sakyanan sa kompanya, giisip sa employer nga seryoso ang paglapas ug desidido silang papahawaon ang trabahante. Apan imbis modawat sa iyang dismissal, misukol ang lalaki ug midangop sa korte, nagreklamo og wrongful termination.
Sa makapakurat nga desisyon sa High Court of Justice of Murcia sa Espanya, giila nga sobra ang silot nga gipataw sa kompanya. Bisan giangkon sa korte nga sayop ang iyang pag-inom, giisip kini nga isolated incidents lamang ug dili habitual drunkenness nga mahimong basehan sa pagtangtang sa trabaho subay sa balaod sa Espanya.
Usa pa sa mga rason sa korte mao nga ang lunch break dili opisyal nga working hours, ug wala’y napresentar nga ebidensya ang kompanya nga naapektuhan ang iyang performance o adunay nahimutang sa peligro tungod sa iyang pag-inom.
Busa, gihatagan og duha ka kapilian ang kompanya: ibalik sa trabaho ang lalaki o bayaran siya og 47 mil euros o kapin 55 mil dolyares nga kompensasyon.
Sa katapusan, napamatud-an nga sa Espanya, bisan ang tulo ka litro nga beer miresulta dili sa pagkawala sa trabaho, kundili sa dakong bayad — apan klaro nga pahinumdom gihapon nga ang pag-inom sa trabaho mahimong makadaot, depende sa balaod ug kahimtang.
Photo courtesy: Busy at Work
