Aprobado sa House Committee on Senior Citizens ang pipila ka mga balaodnon nga nagtinguha sa pagpalig-on sa proteksyon, kaayohan, ug suporta alang sa mga senior citizens sa Pilipinas. Sumala sa committee chair nga si Milagros Aquino-Magsaysay, ang mga lakang nagpunting aron sa paghatag og klaro ug produktibong kinabuhi para sa mga senior citizen.
Lakip sa gi-aprobahan mao ang usa ka balaod nga nagpalapad sa oportunidad nga makatarbaho ang mga senior citizens ug naghatag og dugang incentive gikan sa mga private employer. Matod pa nga kini magpalig-on sa Republic Act No. 7432 nga himuong pagmandato sa job matching sa public employment service offices, pag-awhag sa hiring sa public ug private sector, ug pagtaas sa tax deductions sa mga employer sa senior citizens.
Apil usab sa gi-aprobahan ang balaod alang sa proteksyon sa senior citizens gikan sa mga scams ug fraudulent schemes, diin gi-emphasize ang edukasyon, awareness campaigns, accessible reporting systems, ug mas lig-on nga koordinasyon sa mga ahensya, uban ang suporta sa Department of Information and Communications Technology alang sa online platform.
Gihisgutan usab ang centralized national database alang sa senior citizens aron mas mapadali ang tracking sa benefits, verification, ug policy planning, samtang sa social pensions, gi-aprobahan ang P500 nga binulan nga pension nga magdugang og Php250 matag tuig hangtod moabot sa Php1,000.
Sa karon, gisulod na kini sa Committee on Appropriations alang sa fiscal evaluation, samtang nagpadayon ang deliberasyon sa dugang privileges ug benefits sa senior citizens lakip ang online applicability ug mas lapad nga discount coverage.
Human sa committee approval, ang mga balaodnon kinahanglan pa moagi sa plenary session sa House of Representatives aron mas tun-an ug botaran sa tibuok Kongreso. Human kini ma-aprobahan sa House, ipadala kini sa Senate alang sa susamang proseso sa committee review ug plenary voting. Kon adunay kalainan ang House ug Senate nga bersyon niini, usa ka bicameral committee ang ipahigayon aron mo-reconcile sa pag-finalize sa maong balaodnon ayha kini desisyonan sa Presidente.
Photo Courtesy:Senior Citizens
