Nipahibalo ang Department of Health (DOH) niadtong Sabado nga nagpabiling delikado ang Mindanao sa pagtungha sa sakit nga measles ug rubella tungod sa daghang bata nga wala pa nabakunahan.
Nitala ang ahensya og kapin sa 520,000 ka mga bata, nag-edad lima ka tuig paubos, nga wala pa makadawat og routine immunization sa maong rehiyon. Napakyas ang DOH sa pagkab-ot sa ilang 95% nga target alang sa herd immunity human 82% lang ang nakuha niini sa bag-ohay nga Supplemental Immunization Activity.
Nipasabot si DOH Secretary Teodoro Herbosa nga kon daghan ang dili bakunado, mas paspas ang tinakdanay nga moresulta sa outbreak. Nisuporta usab ang Imam Council of the Philippines sa maong programa, diin ilang gitataw nga ang pagpabakuna wala supak sa mga pagtulun-an sa Islam ug gikinahanglan kini alang sa pagpanalipod sa kinabuhi.
Giawhag sa kagamhanan ang mga ginikanan nga dad-on dayon ang ilang mga anak sa health centers aron masiguro ang proteksyon batok sa makamatay nga mga sakit.
