Nasakmit sa mga otoridad ang balor nga Php204,000.00 nga kantidad sa gidudahang shabu atol sa gipatumang operasyon didto sa Barangay Don Martin Marundan, Mati City, Davao Oriental, niadtong nakalabay nga adlaw.
Ang operasyon gihimo sa mga personahe sa Mati City Police Station nga gipangunahan ni Plt Col. Frederick C Sa-ao, Acting Chief of Police, nga nagresulta sa pagkasikop ni alyas B1, 26-anyos nga residente sa maong dapit.
Nasikop ang suspek pinaagi sa pag-implementar sa search warrant ug nakuha gikan sa iyang posisyon ang pipila ka pakete sa gituohang shabu uban sa uban pang mga drug paraphernalia.
Sa kasamtangan ang dinakpan gikustodiya sa Mati City Police Station alang sa tukmang lakang ug mag atubang sa kasong paglapas sa RA 9165 kun comprehensive dangerous drugs act of 2002.
Padayon karun ang pagpatuman sa balaod sa kapulisan aron nga mapakgang ang mga illegal nga kalihokan ug giawhag ang publiko nga magpabakana ug moreport kanila sa mga kadudahang lihok sa ilang lugar.
Photo Courtesy: Mati CPS
