Namahayag si Cebu City Vice Mayor Tomas Osmeña nga mas maayo nga maangkon sa syudad ang incenerator inay nga waste to energy facility WTE facility isip tubag sa padayon nga problema sa basura sa syudad sa Sugbo.
Sa nahimong sesyon sa sangguniang panlungsod kagahapon, namahayag si Osmeña nga dili tinuod nga makadaginot ang syudad sa WTE facility sanglit kinahanglan gihapon mobayad ang syudad sa gipanghatod nga basura aron makamugna og kuryente. Dugang niini nga mas dako ang gasto sa WTE kun itandi sa mamugna nga kuryente gikan sa basura.
Nahisgutan sab kagahapon ni Cebu City Councilor Dave Tumulak, atol sa sesyon, nga segon sa Department of Public Services (DPS), anaa sa 600 ngadto sa 700 ka tonelada sa basura ang makolekta matag adlaw diin anaa lang sa 450 ka tonelada ang malabay ngadto sa mga landfills.
Kini human nga 150 ka tonelada sa basura lang ang gitugot sa lungsod sa Consolacion nga malabay gikan sa syudad sa Sugbo, samtang 300 ka tonelada sab ang malabay sa syudad ngadto sa lungsod sa Aloguinsan. Diin adunay 150 ngadto sa 250 ka tonelada sa basura ang nagpabilin sa syudad nga wala’y kalabayan.
Samtang, dugang sa Vice Mayor nga angayan nga iprayoridad karon sa syudad kung asa makabarato ug asa mas mahimong dali ang paghipos sa mga basura.
