Gikumpirma sa kabanay ni Julie Ann Adubas nga namatay na kini alas 3:00 sa hapon, Pebrero 15, 2026. Kahinumduman nga si Adubas mao ang uyab sa foreigner nga si Michal Radoslow nga nalumos ug namatay sa Mahayag Beach Resort sa Barangay Buenavista, Tandag City niadtong Pebrero 13, 2026.
Sa unang report, nangaligo ang manag-uyab uban ang pamilya ni Adubas sa maong resort tungod kay nag-despidida sila alang unta sa pag-uli ni Radoslow paingon sa England. Apan, nahimong trahedya ang maong panagtapok.
Sumala sa pamilya, ilang gihangyo ang publiko nga respetohon ang ilang pribasiya ug likayan ang pagpakaylap sa mga impormasyon o komentaryo nga posibleng makadaot sa dungog sa mga namatay. Matod pa nila, parehong biktima ang manag-uyab sa nahitabo nga insidente ug parehong nakabsan sa kinabuhi.
