Nakatala og World Record ang usa ka U.S. Marine veteran nga si Michael Mike Egan usa ka talagsaong kalampusan sa bilateral amputee, alang sa “greatest distance covered in 24 hours by wheelchair” atol sa Veterans Day sa San Antonio, Texas.
Kahibaloan nga si Egan, naputlan og duha ka tiil niadtong 2012 samtang naka-deploy sa Afghanistan, nagpakita og lig-on nga determinasyon ug kusog bisan sa kakapoy ug kabugnaw sa kagabhion. Sulod sa 24 oras, nakompleto niya ang 720 ka laps sa track nga may kinatibuk-ang gilay-on nga 245.2 kilometros.
Sumala pa, gipili niya ang Veterans Day aron maghatag og inspirasyon sa iyang parihong beterano ug mga persons with disabilities nga dili mohunong sa pag-atubang sa mga hagit sa kinabuhi. Sa maong hagit, mikabat sa 18,890 ka calories ang iyang na-burn aron makab-ot ang iyang tumong.
Gawas sa pag-angkon og world title, nahimo usab kini nga pamaagi aron makalikom og $25,000 alang sa Valorfit, usa ka organisasyon nga nagtabang sa mga beterano nga makabangon pag-usab pinaagi sa fitness programs.
Sa iyang emosyonal nga pamahayag, gipahinungod ni Egan ang iyang kalampusan sa komunidad nga misuporta kaniya, ug giingon nga padayon siyang mag-alagad sa uban bisan sa iyang mga sakripisyo isip miyembro sa U.S. Marines.
Pinaagi sa iyang rekord, napamatud an nga walay imposible sa usa ka tawo nga adunay lig-on nga pagtuo, determinasyon, ug kasingkasing nga andam magserbisyo.
Photo Courtesy:Philstar News
