Nagpadayon ang pagpalambo sa turismo sa probinsya sa Zamboanga Sibugay isip kabahin sa kampanya sa lokal nga panggamhanan sa pagdasig sa ekonomiya ug paghatag og dugang oportunidad sa panginabuhian sa mga Sibugaynons.
Sumala sa Provincial Tourism Office, mas gipakusog karon ang promosyon sa mga nagkadaiyang destinasyon sa probinsya sama sa mga baybayon, talon, ug eco-tourism sites. Ang probinsya sa Zamboanga Sibugay nailhan sa iyang natural nga katahum ug malinawon nga palibot nga angay bisitahan sa mga turista.
Lakip sa mga ginapanghambog nga destinasyon mao ang mga isla sa Olutanga nga adunay puti nga balas ug tin-aw nga dagat, nga nagdani og lokal ug langyaw nga mga bisita. Gisuportahan usab sa lokal nga panggamhanan ang mga cultural presentations aron mapreserbar ang tradisyon ug kultura sa mga lumad nga komunidad sa probinsya.
Matod pa sa mga opisyal, padayon ang pagpalambo sa imprastraktura sama sa mga dalan ug pasilidad aron mas masayon ang pag-adto sa nagkalain-laing tourist spots. Gilauman nga pinaagi niini, mas modaghan pa ang mga turista nga mobisita sa Zamboanga Peninsula ilabina sa probinsya sa Zamboanga Sibugay.
Gidasig usab sa kapitolyo ang tanang Sibugaynons sa pagtinabangay sa pagmintinar sa kalimpyo ug kalinaw sa mga destinasyon aron mapadayon ang kalamboan sa turismo sa probinsya.
Photo Courtesy:7641 Islands of the Philippines
