Gitaho sa Bureau of Fisheries and Aquatic Resources sa Caraga Region (BFAR-13) nga mokabat sa Php11.2 milyones nga damyos sa sektor sa Pangisdaan tungod sa pagkusokuso sa Tropical Storm (TS) Basyang.
Nag-landfall si Basyang sa Bayabas, Surigao del Sur sa gabii sa Pebrero 5, nga nagdala og kusog nga ulan sa kadaghanang bahin sa rehiyon.
Gidugang niini nga ang mga kadaot nga nahiaguman naglakip sa produksiyon, paraphernalia, ug pasilidad sa mga indibidwal nga mangingisda ug ilang mga asosasyon.
Ang datus nagpakita nga ang kadaot sa produksiyon niabot sa Php9.9 milyones, nga nakaapekto sa 81.46 metriko tonelada sa produksyon sa pangisda ug 140 ka mananagat sa rehiyon.
Mokabat sa Php1.06 milyones nga kantidad sa mga ekipo, nga gilangkuban sa 466 ka unit sa fiberglass boats, solar lights ug fishing nets sa 279 ka mananagat, ang nangaguba usab atol sa bagyo.
Gipakita usab sa datos nga 21 ka pasilidad nga gipanag-iya sa 39 ka grupo sa mananagat ang nakaangkon ug Php170,000 nga damyos.
Kadaghanan sa mga naguba nga pasilidad mao ang mga dry docks ug salt bed sa lungsod sa Lingig ug ang post-harvest facility sa Cantilan, pareho sa Surigao del Sur.
Photo courtesy: bworldonline
