Gideklarar na ubos sa state of calamity ang lalawigan sa Surigao del Sur human sa grabeng kadaot nga gibilin sa Bagyong Basyang , aron mapaspasan ang rescue, relief, ug rehabilitation efforts sa probinsya.
Giaprubahan sa provincial government sa Surigao del Sur ang resolusyon nga pormal nga nagdeklarar sa state of calamity, human maapektuhan ang kapin 89,816 ka pamilya o 336,671 ka indibidwal gikan sa 249 ka barangay sa nagkadaiyang lungsod sa lalawigan.
Gatusan usab ka indibidwal ang napugos sa paglikas o nawadan og puluy-anan tungod sa kusog nga pagbaha ug landslide nga miigo sa nagkadaiyang lugar, ilabina sa mga lungsod sa Cantilan, Madrid, Lanuza, ug Cortes.
Pinaagi sa maong deklarasyon, maka-access ang probinsya sa calamity funds ug mapaspasan ang pag apod-apod sa tabang ngadto sa mga apektadong residente. Tugotan usab ang mga local government unit (LGU) ug mga ahensya sa gobyerno nga magpatuman og price control sa mga batakang palaliton aron malikayan ang pagsaka sa presyo sa panahon sa kalamidad.
Photo courtesy: simple wikipedia
