Misugod na og pag-ubos ang presyo sa karne sa baboy sa mga merkado tungod sa malampusong hog repopulation program sa pipila ka dapit sa Luzon, lakip na sa Pangasinan, human sa grabeng pag-igo sa African Swine Fever (ASF) niadtong nakalabay nga mga tuig.
Sumala sa Samahang Industriya ng Agrikultura (SINAG), dako ang natabang sa mga paningkamot sa pagpadaghan og balik sa mga baboy aron mokunhod ang presyo niini. Base sa datos sa Department of Agriculture (DA), mas ubos ang average retail price sa baboy karong Pebrero 2026 kon itandi sa miaging tuig, diin niabot pa sa ₱400 matag kilo ang presyo niadtong Abril 2025.
Gipahayag ni Engr. Rosendo So, ang chairman sa SINAG, nga mibalik ang kumpyansa sa mga hog raisers sa pag-invest og usab sa produksyon tungod sa maong programa. Gawas niini, nakatabang usab ang pag-ubos sa farmgate prices ug ang mas hugot nga monitoring batok sa overpricing sa mga baligyaanan.
Sa pikas bahin, nanawagan ang National Federation of Hog Farmers nga ibalik sa mas taas nga lebel ang pork tariffs o buhis sa imported nga karne aron maprotektahan ang lokal nga industriya batok sa mga imported nga produkto.
Sa kinatibuk-an, nakitang positibo ang epekto sa repopulation efforts tungod kay gawas sa igong suplay para sa mga mag-uuma, naghatag usab kini og mas barato ug abot-kaya nga presyo sa karne para sa mga konsumidor.
Photo Courtesy: Pig Progress
