Kung naanad ka nga ma-stress sa traffic ug makatulog samtang naghulat sa elevator, lahi ra gyud ni ang istorya sa Guangzhou, China kay didto, ang elevator mas paspas pa sa imong motor sa highway.
Sa Guangzhou CTF Financial Centre, usa ka 530 metros nga skyscraper nga naabli niadtong 2016, anaa ang pinakapaspas nga elevator sa kalibutan. Hunahunaa: gikan sa ground floor padulong sa ika-95 nga andana… 43 segundos ra. Wala pa gani ka makahunahuna kung “nipislit ba ko sakto nga floor,” naa na dayon ka sa taas.
Ang maong building adunay 95 ka elevators, apan duha ka express elevators ang nahimong bida kay kaya nilang modagan og 1,200 metros matag minuto katumbas sa 72 kilometros matag oras. Ang kanhing record holder sa Taipei 101, naapas na ug klaro kaayo.
Sumala sa mga inhenyero sa Hitachi, dili lalim ang paghimo sa elevator nga murag rocket nga naay pultahan. Gidesenyo kini nga mas gaan gamit ang espesyal nga makina, ug ang elevator car mismo murag aerodynamic capsule aron dili matuyok sa hangin.
Ug kung mahadlok ka nga basin dili na mohunong? Ayaw kabalaka ang preno niini kaya og kainit nga 300 degrees Celsius. Kung ang ordinaryong elevator kay “ding,” kini murag “WHOOSH… STOP.”
Para dili ka malipong o mabungol sa kalit nga pagsaka, ang elevator adunay pressurized cabin nga mo-adjust sa hangin aron dili mobuto ang dunggan sa pasahero.
Busa kung naa ka sa Guangzhou ug nagdali ka, ayaw na pag-jogging sakay na lang sa elevator. Kay sa ilang skyscraper, ang elevator kay dili na lang pang saka og kanaog, pang adrenaline na pud.
Photo Courtesy: Reddit
